dela rosa
Image Source: mb.com.ph

Walay plano nga makig-debate si incoming Philippine National Police (PNP) chief General Ronald “Bato” dela Rosa sa Commission on Human Rights. Kini human sa pipila ka higayon nga gipaboran sa CHR ang mga kriminal nga madakpan sa mga operasyon, ilabi na kung sa brutal nga pamaagi sila dakpon.

Matud kang dela Rosa, natural lamang ang maong reaksyon sa CHR tungod makita nila nga maabuso ang katungod sa usa katao. Saysay niini, tumong sa CHR nga masiguro nga dili mawad-an ug katungod ang usa ka indibidwal.

Bisan paman niini, subling nanawagan si Dela Rosa sa CHR nga sabton na lamang ang ilang ginabuhat nga lakang kontra sa Drug Lords sa nasud. Dugang pa niini, pinaagi sa mga lakang nila makapahimulos man sab ang tibuok nasud.

Nagbahad sa mga kabaro

Subli sab nga gibaharan ni dela Rosa ang iyang mga kabaro nga nalambigit sa hiwing binuhatan. Lakip sa iyang gibaharan ang mga miyembro sa PNP nga naga-recycle ug Droga ug protektor sa illegal drugs.

Matud pa, ipadala sa ARMM ang mga pulis nga mahilig mangotong. Samtang, gikatakda nga magpahigayon ug reshuffling ang PNP dungan sa paglingkod niini isip PNP chief.

Gilayon sab siyang magpahigayon ug command conference , ug sugdan ang operasyon kontra s amga durugista. Mihangyo sab kini ug pag-ampo gikan sa publiko arun mamahimong malampuson ang ilang tumong nga himuong CRIME AND DRUG FREE and Pilipinas.

Ibalik ang respeto sa mga pulis

Himuon sab ni dela Rosa ang tanan niyang makaya arun mabalik ang respeto sa katawhan ngadto sa mga pulis. Saysay ni dela Rosa, usa ka higayon lamang siya mamahimong Chief PNP, ug dili na kini masubli pa hinungdan nga himuon niya ang tanan arun ibalik ang maayong imahe sa kapulisan.

Kalabot niini, gisaysay ni dela Rosa nga sa iyang paglingkod isip chief sa PNP, magtrabaho ang ilang tibuok pwersa kontra kriminalidad ug illegal drugs. I-bawal ang pagtambay sa mga pulis sa ilang mga nagkadaiyang opisina.

Giduso ni dela Rosa nga siguradong masilutan ang mga kurap nga miyembro sa PNP, ilawom sa iyang liderato. (MN)

Advertisements